Timran

ለጥምረት የሴቶች ድምፅ በሀገራዊ ምክክር መድረክ ጽ/ቤት ባለሞያዎች ለሁለት ቀናት የተሰጠው ሥልጠና ተጠናቀቀ

ለጥምረት የሴቶች ድምፅ በሀገራዊ ምክክር መድረክ ጽ/ቤት ባለሞያዎች ታኅሣሥ 03 እና 04 ቀን 2016 ዓ.ም በሀገራዊ ምክክር ሂደት ውስጥ የተሰባሰቡ መረጃዎችን ማደራጀት እና መተንተን የተመለከተ ሥልጠና ተጠናቀቀ።

ሥልጠናው ኢንክሉሲቭ ፒስ በተሰኘ መንግሥታዊ ያልኾነ ድርጅት የተሰጠ ሲኾን፣ በመጀመሪያው ቀን የሰላም ሂደት ድጋፍ አማካሪ በኾኑት ዶ/ር አያክ ሲ.ዲ. አላክ አማካኝነት ጥምረት ለሴቶች ድምፅ በሀገራዊ ምክክር መድረክ በሀገራዊ ምክክር ሂደቱ ውስጥ ተሳታፊ ከመኾኑ ጋር ተያይዞ እስካኹን ያገኛቸው መልካም አጋጣሚዎች፣ ስጋቶች፣ ጠንካራ እና ደካማ ጎኖች ላይ ውይይት ተካሂዷል።

በመቀጠል ኢንክሉሲቭ ፒስ ውስጥ ተመራማሪ የኾኑት ፊሊፕ ፖፕለረውተር፣ አጀንዳዎችን ጾታዊ ማድረግ፣ አጀንዳ ዝግጅት፣ ማደራጀት እና መተንተን ስልቶች በሚሉ ርእሶች ላይ ያተኮረ የዙም ገለጻ ሰጥተዋል፤ በተነሡት ጭብጦች ላይ ውይይት እና የቡድን ተግባራት ተከናውኗል።

በሁለተኛው ቀን ሥልጠና ላይ ነባራዊ ከባቢያዊ ኹኔታ እና አካታችነት በሚሉ ርእሶች ላይ አሠልጣኞቹ በተከታታይ ገለጻ ሰጥተው ጥያቄ እና መልስ ተከናውኗል።

በመቀጠል በቀጣይ ስድስት ወራት ጥምረቱ ኢንክሉሲቭ ፒስን ጨምሮ ከተለያዩ ባለድርሻ አካላት ጋር ሊሠራቸው ይገባል የተባሉ ቁልፍ ተግባራት በቡድን ተለይተው የትግበራ እቅድ ተዘጋጅቷል።

ጥምረት ለሴቶች ድምፅ በሀገራዊ ምክክር መድረክ ሴቶች በሀገራዊ ምክክሩ ውስጥ ትርጉም ያለው ተሳትፎ እንዲኖራቸው ለማስቻል መጋቢት 2014 ዓ.ም የተመሠረተ እና በአኹኑ ወቅት 60 ገደማ አባል ድርጅቶችን ያቀፈ ስብስብ ነው።

ትምራን ጥምረት የሴቶች ድምፅ በሀገራዊ ምክክር መድረክን በጽ/ቤትነት በማገልገል ላይ ትገኛለች።

Share this post on

Share on facebook
Share on telegram
Share on whatsapp
Share on pinterest
Share on twitter
Share on linkedin
Share on skype
Share on print

Latest Posts