Timran

በትውልዶች መካከል ለሚደረግ የፖለቲካ ውይይት ምክረ ሐሳብ ማፍለቂያ የኤክስፐርቶች መድረክ ተካሄደ


በትምራን አነሣሽነት የተዘጋጀ በትውልዶች መካከል ለሚደረግ የፖለቲካ ውይይት ምክረ ሐሳብ ማፍለቂያ የኤክስፐርቶች መድረክ ኅዳር 29 ቀን 2016 ዓ.ም በካፒታል ሆቴል ተካሄደ።
ከሰላም ሚኒስቴር፣ አዲስ አበባ ዩኒቨርሲቲ ፖለቲካ ሳይንስ እና ዓለም አቀፍ ግንኙነት ትምህርት ክፍል፣ አአዩ ሥርዓተ ጾታ ቢሮ፣ አአዩ የመንግሥታት እና ፌዴራሊዝም ጥናት ማእከል፣ ፎረም ኦፍ ፌዴሬሽን፣ ዲያሎግ ኢትዮጵያን ጨምሮ ከልዩ፣ ልዩ መንግሥታዊ እና መንግሥታዊ ያልኾኑ ተቋማት የተወከሉ ምሁራን እና ተመራማሪዎች በመድረኩ ላይ ተሳትፈዋል።
የትምራን ጊዜያዊ ሥራ አስፈጻሚ ማኅደር ዳዲ ለተሳታፊዎችን እንኳ የደኅና መጣችኹ ካሉ በኋላ፣ እንደ ሀገር ሰላም ያስፈልገናል፤ ኢትዮጵያ ውስጥ በትውልዶች መካከል ሰላም ለማምጣት ትውልድ ተሻጋሪ ምክክር ማድረግ ያሻናል ብለዋል።
ትምራን የያዘችው ራእይ ሴቶችን ለአመራርነት ማብቃት እና ውሳኔ ሰጭነት ላይ ንቁ ተሳትፎ እንዲኖራቸው ማስቻል ነው ያሉት ሥራ አስፈጻሚዋ፣ ሴቶች ወደ አመራርነት ሲመጡ ሰላም በማስፈን ረገድ ያላቸው ሚና ከፍተኛ መኾኑን ገልጸዋል።
በጀርመን ልማት ትብብር ስር የሚንቀሳቀሰው ‘ሲቪል ፒስ ሰርቪስ’ የተሰኘ ተቋም ውስጥ የዓለም አቀፍ ሰላም አማካሪ የኾኑት ማርሻ ሊናርዝ፣ ሰላም የኹሉም ነገር መሠረት ነው፤ በሰላም ግንባታ ውስጥ ሴቶችን ማሳተፍ ብሎም በትውልዶች መካከል ውይይት ማድረግ እንደ ኢትዮጵያ ላሉ ሰፊ የሐሳብ ልዩነት ለሚታይባቸው አገራት ወሳኝ መኾኑን አመልክተዋል።
በመቀጠል የትምራን ፕሮግራም አስተባባሪ ባንቺአምላክ እሸቱ በዓለም አቀፍ ደረጃ ያለውን የሰላም እጦት ደረጃ ከኢትዮጵያ 1960ዎቹ ጀምሮ እስካለንበት ጊዜ ድረስ ያለውን ነባራዊ ኹኔታ ጋር የሚያሳይ መነሻ የውይይት ጭብጥ አቅርበዋል።
ይኽንን ተከትሎ ተሳታፊዎች በኢትዮጵያ በትውልዶች መካከል ውይይት አስፈላጊነት ላይ ልዩ፣ ልዩ ሐሳቦችን የሰጡ ሲኾን፣ በትውልዶች መካከል ብቻ ሳይኾን በአንድ ትውልድ ውስጥም የሐሳብ ልዩነቶች ስላሉ ውይይቶቹ ያንንም ያካተቱ እና የፖለቲካ ትውልድ ላይ ያተኮሩ ቢኾኑ የሚሉ ሐሳቦች ሰጥተዋል።
በመጨረሻም በትውልድ መካከል እና በትውልዶች መካከል የሚካሄዱ የፖለቲካ ውይይቶች በቅደም ተከተል እንዲከናወኑ ለማስቻል ሂደቱን የሚያስተባብሩ የትግበራ ቡድን አባላት ከተሳታፊዎች ተመርጠዋል፤ ትምራን የክትትል እና ምዘና ተግባራትን እንድትወጣ ሓላፊነት ተሰጥቷት መድረኩ ተጠናቅቋል።
ትምራን ሴቶች በየትኛውም የፖለቲካ ማእቀፍ እና ውሳኔ ሰጭነት ውስጥ የሚኖራቸውን ተሳትፎ ለማሳደግ በመጋቢት 2012 ዓ.ም የተቋቋመች ከየትኛውም ወገን የማትቆም አገር በቀል ሲቪክ ማኅበር ነች።

Share this post on

Share on facebook
Share on telegram
Share on whatsapp
Share on pinterest
Share on twitter
Share on linkedin
Share on skype
Share on print

Latest Posts