Timran

ትምራን ለመካከለኛ ሴት አመራሮች ያዘጋጀችው የሰላም ግንባታ እና ውትወታ ሥልጠና ኹለተኛ ቀን ውሎ ቀጥሏል

በሥልጠናው መጀመሪያ ቀን ውሎ ከተነሡ ጉዳዮች መካከል አራቱ የሴቶች የሰላም እና ደኅንነት አጀንዳዎች ማለትም መከላከል፣ ጥበቃ፣ ተሳትፎ እና መልሶ ግንባታ ባለድርሻ አካላት ላይ ከተሳታፊዎች በተነሡ ሐሳቦች ተጀምሯል።

የሴቶች ሰላም እና ደኅንነት አጀንዳዎች ባለድርሻ አካላት ከኾኑት መካከል ቤተሰብ፣ ማኅበረሰብ፣ የትምህርት ተቋማት፣ የፀጥታ አካላት (የሕግ ተቋማት)፣ የመንግሥት አስፈጻሚዎች፣ ሚዲያ፣ ፖሊሲ አውጭዎች፣ የጥናት እና ምርምር ባለሞያዎች፣ የሃይማኖት ተቋማት፣ ሲቪክ ማኅበራት፣ ዓለም አቀፍ ተቋማት እና የመሳሰሉት ተጠቅሰዋል።

የሲቪክ ማኅበራት በዋናነት ከመልሶ ግንባታ ጋር በተያያዘ ትልቅ ሚና እንደሚጫወቱ የተገለጸ ሲኾን፣ ከዚኽ ባሻገር አስፈጻሚዎችንና አሠራሮችን መፈተሽ አስፈላጊ መኾኑን አሠልጣኟ አስተዋይ ሳሙኤል ገልጸዋል።

ግንቦት 01 ቀን 2016 ዓ.ም በመካሄድ ላይ በሚገኘው ኹለተኛ ቀን ሥልጠና፣ የግጭት ምንነት፣ ተሳታፊዎች እና መፍትሔዎች ላይ ሠልጣኞች የቡድን ውይይት በማድረግ ሐሳቦቻቸውን አቅርበዋል።

በመቀጠል የግጭት መንስኤዎች ማለትም የግል ፍላጎት፣ የተፈጥሮ ሀብት፣ ታሪክ፣ ሥልጣን እና ሌሎች ጉዳዮች ተጠቃሽ መኾናቸውን የገለጹት አሠልጣኟ፣ ይኽንን መነሻ በማድረግ የግጭትን ምንጮች እና ሂደቶች መረዳት፣ ግጭትን በአግባቡ ማስተዳደር እና መተንተን እንደሚያስፈልግ አብራርተዋል።

ግጭት በአራት ዓይነት መልኩ እንደሚከሰት እና ይኽም ሰው ከራሱ ጋር፣ ሰው ከሌሎች ሰዎች ጋር፣ ሰው ከአካባቢው ጋር፣ ሀገር ከሀገር ሊኾን እንደሚችል ዘርዝረዋል። በተጨማሪም በግጭት ውስጥ ዋነኛ ተዋናዮችን ዓላማ፣ አቋም፣ አቅም እና መስተጋብር በአግባቡ መተንተን እንደሚገባ ገልጸዋል።

በግጭት ወቅት አንድን ወገን ከመደገፍ ይልቅ ሚዛናዊ በኾነ መልኩ ነገሮችን ማየት ወሳኝ ክሂሎት መኾኑም አንሥተዋል።

ግጭት በየትኛውም ጊዜ የማይቀር ቢኾንም ግጭቶች ከመከሰታቸው በፊት ቅድመ ማስጠንቀቂያ እና ቅድመ ምላሽ መስጠት አስፈላጊ መኾኑን፣ ይኽም የሚመጣውን አደጋ ስጋት ክብደት እና ጊዜ መገመት፣ የግጭቱን ተፈጥሮአዊ ኹኔታ መተንተን እንዲኹም ለፀጥታ አካላት የአደጋ ስጋት ማስጠንቀቂያ መረጃ መስጠት አስፈላጊ መኾኑን ጠቁመዋል።

ሥልጠናው የሰላም ግንባታ ምንነት፣ አስፈላጊነት እና ተዋናዮች ላይ በማተኮር የሚቀጥል ሲኾን፣ ግንቦት 02 ቀን 2016 ዓ.ም ይጠናቀቃል።

Share this post on

Share on facebook
Share on telegram
Share on whatsapp
Share on pinterest
Share on twitter
Share on linkedin
Share on skype
Share on print

Latest Posts