Timran

ጥምረት ለሴቶች ድምፅ በሀገራዊ ምክክር መድረክ ለሀገራዊ ምክክር ኮሚሽን የሚቀርቡ የሴቶች አጀንዳዎችን የማጠናቀር መድረክ አጠናቀቀ

ጥምረት ለሴቶች ድምፅ በሀገራዊ ምክክር መድረክ ከዘጠኝ ክልሎች የተሰባሰቡእና ለሀገራዊ ምክክር ኮሚሽን የሚቀርቡ የሴቶች አጀንዳዎችን ለማጠናቀር ያካሄደው መድረክ ግንቦት 16 ቀን 2016 ዓ.ም ተጠናቀቀ።

ከግንቦት 13 ቀን 2016 ዓ.ም ጀምሮ ለአራት ቀናት የቆየው መድረክ ድሬዳዋ እና አዲስ አበባ ከተማ አስተዳደሮችን ጨምሮ ሐረሪ፣ ሲዳማ፣ ቤኒሻንጉል ጉሙዝ፣ ደቡብ ምዕራብ ኢትዮጵያ፣ ሶማሌ፣ አፋር እና ኦሮሚያ ክልሎች በተካሄዱ ከ40 በላይ ምክክር መድረኮች ላይ ሴቶች በሀገራዊ ምክክሩ ላይ እንዲቀርቡላቸው የሚፈልጉ ቁልፍ አጀንዳዎች ተለይተው ለሀገራዊ ምክክር ኮሚሽን እንዲቀርቡ ዝግጅት የተደረገበት ነበር።

መድረኩን የጥምረቱ ሥራ አስፈጻሚ ኮሚቴ አባላት፣ የጥምረቱን ሥራዎች ለማገዝ በየግቦች የተቋቋሙ ኮሚቴዎች አባላት እንዲኹም የጥምረቱ ባለሞያዎች መረጃዎችን ለማጠናቀር የተቀጠረው አማካሪ ድርጅት ጋር በመኾን አከናውነዋል።

በአራት ቀናት ቆይታ ውስጥ በጋራ ስምምነት በወጡ መስፈርቶች እና መመዘኛዎች ለአጀንዳዎች ውጤት የመስጠት ሥራ ተከናውኗል። ሂደቱም ጥምረቱ የቤት እመቤት፣ ከአካል ጉዳት ጋር የሚኖሩ፣ አርሶ አደር እና አርብቶ አደር፣ ነጋዴ፣ ወጣት እያለ በ18 ዓይነት ማኅበራዊ ምድብ የመረጣቸው ሴቶች በየክልላቸው እና የውይይት ምድባቸው ያነሡአቸው አጀንዳዎች ተሰባስበው ክልላዊ አጀንዳዎች እንዲኾኑ በማድረግ ውጤት መስጠት እና መመዘን ያካተተ ነበር።

በዚኽም በቀዳሚነት የደቡብ ምዕራብ ኢትዮጵያ ሴቶች በሦስት ምድቦች ያነሡአቸው ጉዳዮች በተዘጋጁት መስፈርቶች መሠረት በየምድባቸው ውጤት የተሰጣቸው ሲኾን፣ ቀሪዎቹ ስምንት ክልሎች ደግሞ ምድቦቹን ወደ አንድ በማምጣት ለክልላዊ አጀንዳዎች ነጥብ በመስጠት እንዲመዘኑ ተደርጓል። ቀጥሎ አማካሪ ድርጅቱ የየክልሎችን አጀንዳዎች ውጤት ደምሮ ወደ አንድ በማምጣት ሀገራዊ የሴቶች አጀንዳዎች የመለየት ሥራ ያከናውናል።

አጀንዳዎች ተለይተው እና ተተንትነው ከቀረቡ በኋላ ለሀገራዊ ምክክሩ ከመቅረባቸው በፊት የባለድርሻ አካላት ምክክር እንደሚካሄድ ተጠቁሟል።
ጥምረቱ ከዚኽ ጎን ለጎን በሀገራዊ ምክክሩ ሂደት ውስጥ የሴቶች ሐሳቦች ባልተካተቱባቸው ደቡብ ኢትዮጵያ፣ ማእከላዊ ኢትዮጵያ፣ አማራ፣ ጋምቤላ እና ትግራይ ክልሎች የምክክር መድረኮችን በማዘጋጀት የሚያወያይ ሲኾን፣ በደቡብ ኢትዮጵያ ክልል የሴቶችን አጀንዳዎች ማሰባሰብ ግንቦት 07 ቀን 2016 ዓ.ም በይፋ መጀመሩ ይታወሳል።

በመድረኩ ላይ የማጠቃለያ ንግግር ያደረጉት የጥምረቱ ሥራ አስፈጻሚ ኮሚቴ አባል እና የቤኒሻንጉል ጉሙዝ ሴቶች ማኅበር ሰብሳቢ ሃይማኖት ታደሰ፣ በተለያዩ አካባቢዎች ሴቶች የሚደርሱባቸው ችግሮች አንገብጋቢ መኾናቸውን ጠቅሰው፣ አጀንዳዎቻቸው ለሀገራዊ ምክክር ኮሚሽን እንዲቀርቡ የሴቶች ጥምረት ያከናወናቸው ተግባራት የሚደነቁ ናቸው ብለዋል። የሚቀርቡት አጀንዳዎች በሀገር ደረጃ ውይይት ተካሂዶባቸው ለቀጣዩ ትውልድ የተሻለች ሀገር ለማስረከብ የሚያስችል ውጤት ያመጣሉ የሚሉ ተስፋ እንዳላቸው ገልጸዋል።

Share this post on

Share on facebook
Share on telegram
Share on whatsapp
Share on pinterest
Share on twitter
Share on linkedin
Share on skype
Share on print

Latest Posts