Timran

ጥምረት ለሴቶች ድምፅ በሀገራዊ ምክክር መድረክ በኦሮሚያ ክልል የሚያካሂዳቸው ምክክር መድረኮች መክፈቻ መርሐ ግብር ተካሄደ

ጥምረት ለሴቶች ድምፅ በሀገራዊ ምክክር መድረክ በኦሮሚያ ክልል የሚያካሂዳቸው ምክክር መድረኮች መክፈቻ መርሐ ግብር የካቲት 07 ቀን 2016 ዓ.ም በአዳማ ከተማ ተካሄደ።

ለተሳታፊዎች እንኳን ደኅና መጣችኹ ያሉት የጥምረቱ ሥራ አስፈጻሚ አባል እና የተርካንፊ ለዘላቂ ልማት ድርጅት ዳይሬክተር ወርቅነሽ ቤጊ፣ ጥምረቱ ሴቶች በሀገራዊ ምክክር ሂደት ውስጥ ትርጉም ያለው ተሳትፎ እንዲኖራቸው ለማስቻል መጋቢት 2014 ዓ.ም የተቋቋመ መኾኑን ገልጸዋል።

አክለውም ጥምረቱ በአኹኑ ወቅት ከ56 በላይ አባል ድርጅቶች ይዞ በመንቀሳቀስ ላይ እንደሚገኝ ጠቅሰው፣ ባለፈው አንድ ዓመት ውስጥ ሁለት የከተማ አስተዳደሮችን ጨምሮ በድምሩ በስምንት ክልሎች ሴቶች በሀገራዊ ምክክር ሂደት ውስጥ በተገቢው መንገድ እንዲሳተፉ ለማስቻል የአቅም ግንባታ ሥልጠናዎች ማከናወኑን አመልክተዋል።

ኦሮሚያ ዘጠነኛው ክልል መኾኑን ጠቅሰው፣ በቀጣይ ሳምንታት የሚከናወኑት መርሐ ግብሮች ተመሳሳይ ይዘት እንዳላቸው ተናግረዋል።

የዕለቱ የክብር እንግዳ የኾኑት የኦሮሚያ ክልል ሴቶች ፌዴሬሽን ፕሬዚዳንት ኢንጂነር ትዕግሥት ተረፈ በበኩላቸው፣ በሀገራችን የሚታየውን አለመግባባት ለመፍታት ብሎም የሴቶችን ተሳትፎ ለማረጋገጥ ሀገራዊ ምክክር አስፈላጊ መኾኑን ጠቁመዋል።

ዛሬ የተገኘንበት ዋና ዓላማ በቀጣይ በክልሉ የተለያዩ አካባቢዎች ለሚካሄዱ ሰባት የአቅም ግንባታ መድረኮች የመክፈቻ መርሐ ግብር ለማካሄድ ነው ብለዋል።

በቀጣይም በሀገራዊ ምክክር ብቻ ሳይኾን በሌሎች ጉዳዮች ላይ በጋራ ተጣምረን እንሥራ በማለት ሐሳባቸውን አጠቃልለዋል።

ማንኛውም ሰው ሐሳብ ስላለው መመካከር እና ቁጭ ብሎ መነጋገር የግድ ነው ያሉት የኦሮሚያ ክልል ሰላም እና ፀጥታ ቢሮ አማካሪ አቶ ጀግናው ግዛው፣ ሀገራዊ ምክክር የተለያዩ ሐሳቦችን ወደ አንድ ለማምጣት የሚያስችለን አንዱ መንገድ በመኾኑ ዕድሉን ልንጠቀምበት ይገባል ብለዋል።

በተጨማሪም በየትኛውም ሀገራዊ ጉዳይ ላይ የሴቶች ድምፅ መካተት አስተዋጽኦ ስላለው መሰል መርሐ ግብሮች አስፈላጊ በመኾናቸው ሊበረታቱ ይገባል በማለት ገልጸዋል።

በመቀጠል የጥምረቱ የትምህርት እና ሥልጠና ባለሞያ እስከዳር ታደሰ የሀገራዊ ምክክር ምንነት፣ ሥርዓተ ጾታ፣ የምክክር አካታችነት እና ተያያዥ ጉዳዮች ላይ ለተሳታፊዎች ገለጻ ሰጥተዋል።

የጥምረት ለሴቶች ድምፅ በሀገራዊ ምክክር መድረክ ሥራ አስኪያጅ አቶ አስቻለው ማቴዎስ በበኩላቸው፣ ጥምረቱ ባለፉት ጊዜያት ስላከናወናቸው ተግባራት እና በቀጣይ ሳምንታት በኦሮሚያ ክልል ምክክር የሚካሄድባቸው ምድቦችን በተመለከተ ማብራሪያ ሰጥተዋል።
በመጨረሻም ከተሳታፊዎች ጥያቄዎች ተነሥተው፣ ምላሽ ቀርቦ መርሐ ግብሩ ተጠናቅቋል።

Share this post on

Share on facebook
Share on telegram
Share on whatsapp
Share on pinterest
Share on twitter
Share on linkedin
Share on skype
Share on print

Latest Posts