Timran

ጥምረት ለሴቶች ድምፅ በሀገራዊ ምክክር መድረክ የደቡብ ኢትዮጵያ ክልል የሴቶች ምክክር መድረክ ማስጀመሪያ መርሐ ግብር አካሄደ

ጥምረት ለሴቶች ድምፅ በሀገራዊ ምክክር መድረክ የደቡብ ኢትዮጵያ ክልል የሴቶች ምክክር መድረክ ማስጀመሪያ መርሐ ግብር ግንቦት 07 ቀን 2016 ዓ.ም አካሄደ።

ምክክሩን በንግግር የከፈቱት የደቡብ ኢትዮጵያ ክልል ሴቶች ማኅበር ሰብሳቢ ኩሪ ናደው ለተሳታፊዎች የእንኳን ደኅና መጣችኹ መልእክት ያስተላለፉ ሲኾን፣ የወላይታ ዞን አፈ ጉባኤ ክብርት ወይንሸት ሞላ ደግሞ ቁልፍ ንግግር አድርገዋል።

አፈ ጉባኤዋ በንግግራቸው ሀገርን ለማጽናት ምክክር አስፈላጊ መኾኑን ጠቅሰው፣ ሀገራዊ ምክክርን ጨምሮ በየትኛውም የሰላም ግንባታ እንቅስቃሴ ውስጥ የሴቶች ተሳትፎ አስፈላጊ ነው ብለዋል።

በመቀጠል የጥምረት ለሴቶች ድምፅ በሀገራዊ ምክክር መድረክ ፕሮጀክት አስተባባሪ አቶ አስቻለው ማቴዎስ፣ ጥምረቱ ከተመሠረተበት መጋቢት 2014 ዓ.ም ጀምሮ ያከናወናቸውን ተግባራት፣ በተለይም ባለፉት አንድ ዓመት ውስጥ ከኹሉም የሀገሪቱ ክልሎች ለመጡ 151 ሴት አስተባባሪዎች ሥልጠና መስጠት ጨምሮ በዘጠኝ ክልሎች ለአራት ሺህ ገደማ ሴቶች የሀገራዊ ምክክር ምንነት ጋር ተያያዥ በኾኑ ርእስ ጉዳዮች የአቅም ግንባታ መድረኮች ማዘጋጀቱን ገልጸዋል።

በደቡብ ኢትዮጵያ ክልል፣ ወላይታ ሶዶ ከተማ የተከፈተው መድረክ በሀገራዊ ምክክር ላይ ከተካሄዱ የሴቶች መድረኮች 10ኛው ክልል መኾኑንም ጠቅሰዋል።

የጥምረቱ የትምህርት እና ቅስቀሳ ባለሞያ እስከዳር ታደሰ በበኩላቸው፣ የሀገራዊ ምክክር ምንነት፣ አስፈላጊነት እና ከሌሎች የግጭት መፍቻ ዘዴዎች የሚለይባቸው መንገዶች፣ ሥርዓተ ጾታ እና አካታችነት፣ የድምፅ መስጫ አማራጭ መንገዶች ጋር የተያያዙ ርእሰ ጉዳዮች ላይ ማብራሪያ ሰጥተዋል።

የጥምረቱ የክትትል እና ግምገማ ባለሞያ አስማማው መኮንን እንዲኹ፣ በደቡብ ኢትዮጵያ ክልል የሚካሄዱ የሴቶች ምክክር መድረኮች በዘጠኝ ምድቦች ማለትም ወላይታ ምድብ፣ ጋሞ ምድብ፣ ጎፋ እና ባስኬቶ ምድብ፣ ኮንሶ እና አሌ ምድብ፣ ኮሬ፣ ጋርዱላ እና ቡርጂ ምድብ፣ አሪ ምድብ፣ ደቡብ ኦሞ ምድብ እንዲኹም ጌዲኦ ምድብ በሚል የሚካሄድ መኾኑን አመልክተዋል።

በመርሐ ግብሩ መሠረት የቀረቡትን ገለጻዎች ተከትሎ የመድረኩ ተሳታፊዎች ጥያቄዎች እና አስተያየት ሰጥተው ማብራሪያ ከተሰጠ በኋላ መርሐ ግብሩ ተጠቃልሏል።

በደቡብ ኢትዮጵያ ክልል በተከታታይ በሚካሄዱ ዘጠኝ የሴቶች መድረኮች 400 ያኽል ሴቶች ይሳተፋሉ ተብሎ ይጠበቃል።

ጥምረት ለሴቶች ድምፅ በሀገራዊ ምክክር መድረክ ሴቶች በሀገራዊ ምክክር መድረክ ሂደት ውስጥ ትርጉም ያለው ተሳትፎ እንዲኖራቸው የተቋቋመ ሲኾን፣ በአኹኑ ወቅት 60 ገደማ አባል ድርጅቶችን አቅፎ በመንቀሳቀስ ላይ ይገኛል።

የሴቶችን የፖለቲካ ተሳትፎ ለማሳደግ እና በሀገሪቱ የውሳኔ ሰጭነት ሚና ተገቢ ውክልና እንዲኖራቸው ለማስቻል የምትሠራው ትምራን ላለፉት ኹለት ዓመታት የጥምረቱ ጽሕፈት ቤት ኾና በማገልገል ላይ ትገኛለች።

Share this post on

Share on facebook
Share on telegram
Share on whatsapp
Share on pinterest
Share on twitter
Share on linkedin
Share on skype
Share on print

Latest Posts